वरुण क्याम्पसमा डा. अर्जुन कार्कीको स्वागतसँगै विद्यार्थीलाई प्रेरणादायी मार्गदर्शन कार्यक्रम सम्पन्न ।

07, Oct 2026 | वरुण क्याम्पसमा डा. अर्जुन कार्कीको स्वागतसँगै विद्यार्थीलाई प्रेरणादायी मार्गदर्शन कार्यक्रम सम्पन्न ।

प्रतिनिधिसभाका माननीय सदस्य, नेपालका पूर्व अमेरिका राजदूत तथा वरुण बहुमुखी क्याम्पसका सल्लाहकार डा. अर्जुन कार्कीलाई क्याम्पसमा विशेष कार्यक्रमका बीच स्वागत तथा सम्मान गरिएको छ। सोही अवसरमा स्नातक तहमा अध्ययनरत विद्यार्थीहरूका लागि उत्प्रेरणात्मक तथा अभिमुखीकरण कार्यक्रमसमेत सम्पन्न भएको छ।

विद्यार्थीहरूमा सकारात्मक सोच, आत्मविश्वास, नेतृत्व क्षमता, अनुशासन तथा अध्ययनप्रतिको रुचि अभिवृद्धि गर्दै उच्च शिक्षा, व्यक्तिगत विकास र भविष्य निर्माणका सम्बन्धमा स्पष्ट दृष्टिकोण विकास गर्ने उद्देश्यले कार्यक्रम आयोजना गरिएको हो।

क्याम्पस सञ्चालक समितिका अध्यक्ष श्री दीर्घ ध्वज चापागाईंको अध्यक्षतामा सम्पन्न कार्यक्रममा क्याम्पस प्रमुख श्री चित्ररेखा कार्की, सहायक क्याम्पस प्रमुख श्री छत्रमणी पन्त, QAA Focal Person श्री रूद्रनाथ दाहाल, प्राध्यापक, कर्मचारी तथा विद्यार्थीहरूको सहभागिता रहेको थियो।

कार्यक्रममा डा. कार्कीले विद्यार्थीहरूलाई लक्ष्य निर्धारण, निरन्तर अध्ययन तथा सिकाइ, अनुशासन, सकारात्मक सोच, नेतृत्व क्षमता र आत्मविश्वासका विषयमा प्रेरणादायी तथा व्यवहारिक मार्गदर्शन प्रदान गर्नुभयो। बदलिँदो प्रतिस्पर्धात्मक परिवेशमा शैक्षिक ज्ञानसँगै व्यावहारिक ज्ञान, सञ्चार सीप र नेतृत्व क्षमताको विकास गर्नुपर्नेमा उहाँले जोड दिनुभयो।

कार्यक्रमका सहभागीहरूले डा. कार्कीबाट प्राप्त मार्गदर्शन विद्यार्थीहरूको शैक्षिक, व्यक्तिगत तथा व्यावसायिक विकासका लागि उपयोगी रहेको धारणा व्यक्त गरेका थिए।

क्याम्पस प्रमुख श्री चित्ररेखा कार्कीले विद्यार्थीहरूको सर्वाङ्गीण विकासका लागि यस्ता शैक्षिक तथा उत्प्रेरणात्मक कार्यक्रमलाई आगामी दिनमा समेत निरन्तरता दिइने बताउनुभयो। कार्यक्रम सफल बनाउन सहयोग गर्नुहुने सम्पूर्ण प्राध्यापक, कर्मचारी, विद्यार्थी तथा सम्बन्धित सबैप्रति क्याम्पस परिवारले धन्यवाद ज्ञापन गरेको छ।

Go back to Notice